يا ماخذ الدنيا وساعة صدر .. ومزاح .. وضحك

يا ماخذ الدنيا وساعة صدر .. ومزاح .. وضحك
علمني كيف اتخلص من الضيق واضحك وابتسم
لا صرت ما تلقى صديق ٍ يحتويـك وينصحـك
في وقت ما تاخذ به امْن الأصدقا .. غير الإسـم
تخيّل إنك فـي مكانـي وانـت كـل ٍ يجرحـك
والهم (كسرة خبز) ما بينك وبينـك .. تنقسـم
والناس حولك تذبحك .. من زود ماهي تذبحـك
ما باقي الا يوسمون الطعن في ظهرك .. وسـم
وان جيت تشكي قالوا: اسكت بس والله يصلحك
الجرح جرحك .. والبلا بلواك .. والأمر انحسـم
والصبر لو ما كل جنب ٍ في منامـك .. ريّحـك
البال ماهي راحته من راحة .. اعضاء الجسـم
ولاّ انت يومك رحت تشكي وش معاك ومربحـك
من واحد ٍ بالعجـز وانـواع التخـاذل ..يتّسـم
يقسم لك إنه لو درى في ضيقتك .. ما يفظحـك
والمشكله يمشي ويفظح فيك .. ويضيع القسـم
تفرض عليه المصلحه .. لو ما يذمك .. يمدحك
يعني كأنه لوحةٍ حسـب المصالـح .. ترتسـم
وتضيع ما تدري من اللي لا نخيتـه .. يمنحـك
الوقت صكاته كثيـر .. وطبـع صكاتـه دسـم
والقهر .. لامن جيت تفرح .. ما تلاقي مطرحك
في عالم ٍ من ضيق صدر اهله .. تدوّر للنسـم
فإن ضاق صدرك وسّعه ياشيخ .. واقلبها ضحك
معك الحياه بتبتسم .. بس إنت الاول .. إبتسـم